Ásgeir Aron líka til ÍBV

Ásgeir Aron Ásgeirsson hefur komist að samkomulagi við ÍBV um að leika með félaginu næsta árið.

Þetta staðfesti hann í samtali við Vísi í dag. Ásgeir Aron lék síðast með Fjölni sem féll úr Pepsi-deild karla og samningur hans við félagið rennur út núna um áramótin.

Ásgeir Aron er sonur Ásgeirs Sigurvinssonar, eins frægasta leikmanni ÍBV frá upphafi. Hann mun því klæðast sama búningi og pabbi sinn gerði í upphafi síns ferils.

„Öll fjölskyldan er virkilega spennt fyrir þessu. Sjálfur líst mér frábærlega á að spila með ÍBV og ætla ég að reyna að láta til mín taka hjá félaginu," sagði Ásgeir Aron í samtali við Vísi.