Mokoena eini Suður-Afríkumaðurinn sem var í byrjunarliðinu 2005

Fyrirliðinn Aaron Mokoena er eini maðurinn í landsilðshópi Suður-Afríku sem mætir Íslandi í dag sem var í byrjunarliði liðsins sem tapaði 4-1 fyrir Íslandi í ágúst árið 2005.

Þrír leikmenn sem voru varamenn þá eru í hópnum nú - þeir Bevan Fransman, Elrio van Heerden og Rowan Fernandez. Þeir tveir fyrstnefndu komu inn á sem varamenn í leiknum.

Árni Gautur Arason, Kristján Örn Sigurðsson, Indriði Sigurðsson og Grétar Rafn Steinsson voru allir í byrjunarliði Íslands í þeim leik en þeir verða einnig í byrjunarliðinu í kvöld.

Þeir Grétar Rafn, Arnar Þór Viðarsson, Heiðar Helguson og Veigar Páll Gunnarsson skoruðu mörk Íslands í leiknum.

Liðin mættust einnig í vináttulandsleik ytra þann 6. júní 1998. Brynjar Björn Gunnarsson, fyrirliði Íslands í dag, var í byrjunarliðinu í þeim leik sem lyktaði með 1-1 jafntefli. Stefán Þór Þórðarson skoraði mark Íslands í leiknum.