Félagsmálaráðherra bregst við gagnrýni á skuldavandafrumvarp

„Fjarstæða er að halda því fram að þeir sem veðjuðu á fall krónunnar fái skuldir sínar felldar niður en hirði gróðann samkvæmt nýrri löggjöf um lausn á skuldvanda einstaklinga, heimila og fyrirtækja," segir í tilkynningu frá félags- og tryggingamálaráðuneytinu. Sértæk skuldaaðlögun byggist á því að þeir sem eigi í miklum greiðsluerfiðleikum greiði eins stóran hlut af skuldum sínum og greiðslugeta þeirra leyfi og að eignir gangi jafnframt upp í skuldir.

Þór Saari, þingmaður Hreyfingarinnar, hefur gagnrýnt lögin töluvert um helgina á þeim forsendum að hópur manna sem farið hafi ógætilega muni hagnast þá þeim.

Í tilkynningu ráðuneytisins segir hins vegar að öllum megi vera ljóst að enginn muni ríða feitum hesti frá því að ganga í gegnum sértæka skuldaaðlögun. Áður en ráðist sé í skuldaaðlögun einstaklinga séu eignir og skuldir viðkomandi metnar sem og tekjur hans, hvaða nafni sem þær nefnast. Gerð sé greiðsluáætlun þar sem miðað sé við að viðkomandi hafi til ráðstöfunar það sem honum sé nauðsynlegt til lágmarksframfærslu samkvæmt viðmiðum Ráðgjafarstofu um fjármál heimilanna. Tekjur umfram þetta viðmið fari til greiðslu á skuldum. Allar eignir umfram hóflegt húsnæði og einn bíl séu seldar eða teknar upp í skuldir af viðkomandi kröfuhöfum. Eingöngu persónubundnar skuldir muni koma til skoðunar við sértæka skuldaaðlögun en ljóst sé að úrræðið muni bjarga þúsundum heimila frá þrotameðferð fyrir dómstólum.



Úrræðið mun ekki gagnast óreiðumönnum

„Sértæk skuldaaðlögun mun ekki nýtast þeim sem hafa skuldsett sig langt umfram það sem raunhæft var miðað við tekjur og eignastöðu. Þeirra bíður annað hvort greiðsluaðlögun fyrir dómi eða gjaldþrotameðferð.

Samkvæmt lögunum er alveg skýrt að eignarhaldsfélög sem stofnuð voru um kaup á hlutabréfum koma ekki til greina í sértæka skuldaðlögun. Þau eru algjörlega útilokuð frá þessu úrræði þar sem þau teljast ekki lífvænleg fyrirtæki í skilningi laganna heldur félög með fallnar forsendur.

Mögulegar skuldbreytingar og breytingar á skilmálum lánasamninga hjá fyrirtækjum sem kunna að leiða til eftirgjafar skulda munu byggjast á nákvæmum starfsreglum. Fjármálaeftirlitinu er falið eftirlit með því að þeim sé fylgt og hefur til þess ýmis úrræði sem skýrð eru í lögunum. Eftirlitsnefnd skv. 4. gr. laganna skal fylgjast með og kanna að eigin frumkvæði hvort eftirlitsskyldir aðilar á fjármálamarkaði framfylgja samræmdum reglum sem kunna að verða settar og ad gætt se sanngirni og jafnræðis milli skuldara,“ segir í tilkynningu frá félagsmálaráðuneytinu.

Þá hafnar ráðuneytið þeirri gagnrýni að umræddri lagasetningu hafi verið ýtt í gegnum þingið með óeðlilegum hraða. Við gerð frumvarpsins og undirbúnings lagasetningarinnar hafi verið haft víðtækt samráð þá fjölmörgu og ólíku hagsmunaaðila sem málið varði. Í kjölfar þessa samráðs hafi málið verið kynnt opinberlega í lok september og þá komið fram að áformað hafi verið að lögin tækju gildi 1. nóvember. Þá bendir ráðuneytið jafnframt á að þingmenn allra flokka hafi fallist á að frumvarpið yrði tekið til umfjöllunar á Alþingi með afbrigðum til að flýta fyrir málsmeðferðinni, þar sem nær öllum hafi verið ljóst mikilvægi þess að hrinda boðuðum aðgerðum sem fyrst í framkvæmd. Frumvarpið hafi verið samþykkt á Alþingi með stuðningi þingmanna allra flokka og aðeins einu mótatkvæði.