Segir Ólínu hafa hlegið að eineltisræðu Birgittu

Þingmaður Borgarahreyfingarinnar, Þór Saari, gagnrýnir þingkonu Samfylkingarinnar, Ólínu Þorvarðardóttur sérstaklega í pistli sem hann skrifaði á bloggið sitt í dag.

Þar sakar hann þingkonuna um að hafa hlegið að Birgittu Jónsdóttur, þingkonu Borgarahreyfingarinnar, þegar hún stakk upp á því að Alþingi þyrfti hugsanlega á eineltisforvarnaráætluninni Olewus að halda.

Tilefnið var ræða Birgittu sem hún flutti í gær þar sem hún sagði Vinstri græna og Samfylkinguna hafa lagt eigin flokksmenn í einelti og því vill Birgitta að þingmenn fái ekki að víkja úr þingsal þegar atkvæðagreiðslur eigi sér stað.

Þór skrifar: „Annað ljótt mál skaut aftur upp kollinum þegar Birgitta minntist á eineltið sem margir þingmenn VG urðu fyrir í aðdraganda atkvæðagreiðslunnar um ESB í síðustu viku.

Þá voru einstaka þingmenn sem vitað var að ætluðu að segja nei eða sitja hjá teknir í "viðtal" hjá Jóhönnu sem sat í hliðarsal og sendi hún sendi Björgvin G. ítrekað inn í þingsal eftir villuráfandi VG liðum. Þegar Birgitta var langt komin í athugasemd sinni og þingmönnum ljóst hvað hún var að tala um upphófust mikil frammíköll frá þingkonum Samfylkingar og þá sérstaklega Ólínu Þorvarðardóttur en hún og fleiri höfðu uppi háðsglósur og hlátur um athugasemd Birgittu.

Þetta er hins vegar grafalvarlegt mál og alls ekki sæmandi þjóðþingi landsins og það er sennilega óþægilegt fyrir stjórnarmeirihlutann að sjálft Alþingi þurfi hugsanlega á Olewus áætlun að halda."

Bloggið má lesa í heild sinni hér.