Verð skólamáltíða hækkar ekki þrátt fyrir hækkandi verðlag

„Nei, það hefur engin ákvörðun verið tekin um það," segir Kjartan Magnússon, borgarfulltrúi og formaður menntaráðs, aðspurður hvort til standi að hækka verð á skólamáltíðum fyrir komandi haust.

„Við samræmdum verðið síðasta ár, sem þýddi í flestum tilfellum lækkun," segir Kjartan, en verð skólamáltíða í grunnskólum Reykjavíkur er nú 250 krónur.

Kjartan segir ekki hafa verið rætt um hækkun á gjaldskrá, en það verði rætt fyrir fjárhagsáætlunargerð í vetur.

„Það er náttúrulega verið að reka borgina að miklu leyti á gömlum gjaldskrám þegar flest annað hefur hækkað."

En telur Kjartan að það geti orðið til vandræða fyrir skólaeldhúsin að verðið standi í stað þegar aðföng hækka í verði?

„Þegar við samræmdum gjaldið á síðasta ári, þá þýddi það bara meiri kostnað fyrir borgina, svo það bitnaði ekki á eldhúsunum," segir Kjartan.