Zola gæti hætt hjá West Ham

Knattspyrnustjórinn Gianfranco Zola hjá West Ham hefur látið í það skína að hann muni hætta hjá félaginu ef það stendur ekki við þau áform sem uppi voru þegar hann tók við liðinu á sínum tíma.

Ljóst er að staða West Ham er ekki glæsileg þar sem kreppan hefur komið þungt niður á Björgólfi Guðmundssyni eiganda félagsins.

Talið er að Björgólfur sé tilbúinn til að selja West Ham og ljóst er að ekki verða til miklir peningar til leikmannakaupa á næstunni. Þá hangir Tevez málið yfir félaginu þar sem það gæti þurft að punga út tugum milljóna punda í skaðabætur.

"Mér hefur verið sagt að ekkert breytist hjá félaginu en við skulum sjá til. Ef mér verður sagt að félagið þurfi að breyta um aðferðafræði, myndi ég þurfa að endurskoða mín mál líka því þá væru forsendur aðrar en voru upphaflega," var haft eftir Zola í News of the World í dag.

"Þegar ég samþykkti að taka við félaginu var það af því hér átti að rækta þá leikmenn sem hér voru fyrir og byggja á yngri leikmönnum þangað til við gætum orðið samkeppnishæfir. Þetta var upphafleg áætlun okkar en síðan hefur eitt og annað gerst innan og utan vallar. Við þurfum tíma, en forráðamenn félagsins verða að ræða við mig ef á að breyta um stefnu," sagði Zola.