ÍA áfrýjaði rauða spjaldi Stefáns

ÍA hefur áfrýjað rauða spjaldinu sem Stefán Þór Þórðarson fékk í leik Keflavíkur og ÍA á sunnudagskvöldið. Þetta staðfesti Gísli Gíslason, formaður meistaraflokksráðs karla hjá ÍA.

Gísli sagði að hann hefði sent inn greinagerð til aga- og úrskurðarnefndar KSÍ þar sem athugasemdir eru gerðar við síðara gula spjaldið sem Stefán fékk í leiknum.

„Það fylgir myndbandsupptaka sem sýnir að það átti sér stað engin snerting hjá Stefáni og að hann hafi einungis farið í boltann," sagði Gísli. „Við höfum því farið fram á að þessi yfirsjón verði leiðrétt."

Hér í fréttinni að neðan má skoða atvikin bæði sem Stefán var áminntur fyrir. Í kjölfarið á þessu sagði Guðjón Þórðarson, þjálfari ÍA, að Ólafur Ragnarsson dómari leiksins hefði beitt Stefán ofbeldi með því að vísa honum af velli. Einnig að dómarar hefðu hist sérstaklega á fundi til að ákveða hvernig væri best að taka á Skagamönnum og þá sérstaklega Stefáni.

Áfrýjunin tengist þó ekkert ummælum Guðjóns en aganefndin mun mjög líklega fara fram á greinagerð frá honum vegna ummælanna. Þórir Hákonarson, framkvæmdarstjóri KSÍ, skaut ummælum hans til aganefndarinnar.

Það er þó ólíklegt að nefndin geti tekið myndbandsupptökuna sem Gísli sendi með greinagerð sinni til nefndarinnar. Í reglugerð KSÍ um aga- og úrskurðarmál segir eftirfarandi:

„Það er grundvallarregla að myndbandsupptökur skulu ekki notaðar við ákvörðun viðurlaga vegna agabrota. Ef það er hins vegar mat nefndarinnar að fyrirliggjandi gögn séu ófullnægjandi sem grundvöllur er nefndinni heimilt sem síðasta úrræði að styðjast við myndbandsupptökur. Í slíkum tilfellum skal einungis heimilt að nota upptökur frá viðurkenndum sjónvarpsstöðvum."

Þar sem dómari leiksins tók afstöðu til brotsins á vellinum er afar ólíklegt að nefndin muni nota myndbandsupptöku til að hnekkja ákvörðun hans.