Allt að 30 manns áttu upphaflega að ráðast á Mumbai

Lögregla á Indlandi telur að allt að 30 manns hafi upphaflega hlotið þjálfun á vegum Lashkar-e-Taiba-hryðjuverkasamtakanna með það fyrir augum að fremja umfangsmikil hryðjuverk í indversku borginni Mumbai.

Tíu árásarmenn frömdu ódæðisverkin og urðu tæplega 200 manns að bana í lok nóvember. Rannsókn málsins hefur nú leitt í ljós að stjórnandi aðgerða var Zarrar Shah, háttsettur maður innan samtakanna, og stýrði hann mönnum sínum gegnum netsímaþjónustu sem gerir það nær ókleift að hlera símtöl eða rekja þau.