Hundrað manna hópuppsagnir um mánaðamótin

Vinnumálastofnun bárust í gær 4 tilkynningar um hópuppsagnir, allar frá fyrirtækjum í byggingariðnaði, samtals ríflega 100 manns. Allir aðilar nefna samdrátt í verkefnum og viðbrögð við erfiðleikum á markaði sem skýringar á uppsögnum.

Vinnumálastofnun mun greina frá því á morgun hverjir þessir fjórir aðilar eru sem stóðu að hópuppsögnum. En eins og Vísir greindi frá fyrir nokkrum dögum sögðu ÞG verktakar upp tugum starfsmanna. Í fréttatilkynningu sem ÞG hafa sent frá sér segir að þeir séu 31 talsins. Þá sagði BYGG upp 20 manns og Mótás sagði upp 16 manns. Einnig hafa fréttir borist af því að Eykt hafi sagt upp 15 manns.