HK féll - KR burstaði Þrótt

Það verða ÍA og HK sem fá það hlutskipti að falla úr Landsbankadeild karla í knattspyrnu en baráttan um sigur í deildinni er enn opin eftir sigur FH á Keflavík.

Fylgst var með öllum leikjum dagsins á Boltavaktinni

HK-menn þurftu nauðsynlega á sigri að halda gegn Fjölni í Grafarvogi, en fljótt varð ljóst að þetta var ekki dagur Kópavogsliðsins. Þeir Pétur Markan og Davíð Rúnarsson komu Fjölni í 2-0 eftir aðeins 16 mínútna leik og útlitið því strax orðið dökkt hjá HK. Sinisa Kekic minnkaði muninn fyrir HK með marki úr víti á 64. mínútu en aðeins fjórum mínútum gerði Gunnar Guðmundsson út um leikinn fyrir Fjölni með marki úr vítaspyrnu.

Skagamenn voru þegar fallnir úr deildinni en þeir sóttu Grindvíkinga heim suður með sjó. Grindvíkingar hafa verið arfaslakir á heimavelli í allt sumar og á því varð engin breyting í dag. Gilles Ondo kom heimamönnum reyndar yfir í leiknum en Árni Pjetursson jafnaði fyrir Skagamenn í upphafi síðari hálfleiks og þar við sat þó gestirnir hefðu verið sterkari á lokasprettinum.

KR-ingar tóku Þróttara í bakaríið á heimavelli sínum 5-2. Björgólfur Takefusa, Bjarni Guðjónsson, Viktor Bjarki Arnarsson, Guðjón Baldvinsson og Gunnar Örn Jónsson skoruðu mörk KR í leiknum, en Hjörtur Hjartarson og Adolf Sveinsson klóruðu í bakkann fyrir Þróttara sem þegar höfðu tryggt veru sína í deildinni.

Fylkir slapp líka endanlega við fall í dag eftir að HK tapaði fyrir Fjölni, en Fylkismenn unnu góðan 3-2 sigur á Breiðablik í Kópavogi. Jóhann Berg Guðmundsson kom heimamönnum reyndar yfir með marki úr víti strax í byrjun leiks, en Haukur Ingi Guðnason og Kjartan Baldvinsson komu Fylki yfir með tveimur mörkum skömmu fyrir hlé. Kjartan bætti svo við öðru marki sínu á 90. mínútu áður en Marel Baldvinsson minnkaði muninn fyrir Blika.

Fram heldur áfram góðu gengi sínu í deildinni og í dag lagði liðið Val 2-1 á heimavelli sínum. Ívar Björnsson kom Frömurum yfir strax á 8. mínútu og Joseph Tillen bætti við öðru marki strax á upphafsmínútum síðari hálfleiks. Baldur Aðalsteinsson minnkaði muninn fyrir Val á 62. mínútu, en lengra komust Valsmenn ekki.

Keflvíkingar eru á toppi deildarinnar með 46 stig eftir 21 leik og FH í öðru sæti með 41 stig og á leik til góða gegn Blikum á miðvikudaginn.

Framarar eru í þriðja sætinu með 37 stig, KR í fjórða með 36 stig og Valsarar í fimmta með 35 stig. Þessi lið munu því berjast um Evrópusæti í lokaumferðinni.

Stöðuna í deildinni má sjá á Boltavaktinni.