Terry: Ég gat ekki einu sinni fagnað

John Terry fyrirliði Chelsea gat leyft sér að brosa í kvöld eftir að hans menn komu sér í hugguleg mál í Meistaradeildinni með 1-0 sigri á Roma á Stamford Bridge.

"Þeir gerðu okkur erfitt fyrir í kvöld en við náðum í stigin þrjú. Þetta Roma lið er vel mannað og átti ef til vill eitthvað skilið út úr þessum leik, en þetta hafðist," sagði fyrirliðinn í samtali við Sky.

Terry skoraði þarna sitt fyrsta mark í Meistaradeildinni í langan tíma, en glöggir áhorfendur veittu því athygli að hann lagðist í völlinn eftir markið í stað þess að fagna eins og venjulegga.

"Það var gaman að skora loksins, en ég fékk krampa svo ég gat ekki einu sinni fagnað," sagði Terry léttur í bragði.

Leikurinn í kvöld þótti ekki sérlega skemmtilegur á að horfa en Luiz Scolari knattspyrnustjóri Chelsea á von á svipuðum leik í Róm í næstu umferð.

"Þetta var fínn leikur þó hann hefði farið 1-0 og ég á von á mjög svipuðum leik í Róm."