Delap segist ekki ætla að keppa í spjótkasti á Ólympíuleikunum

Rory Delap, leikmaður Stoke, segir engar líkur á því að hann muni keppa á Ólympíuleikum fyrir hönd Írlands - í spjótkasti.

Delap hefur vakið athygli fyrir löngu innköstin sín og hefur verið orðrómur á kreiki að hann kunni sitthvað fyrir sér í spjótkasti.

„Þeir hljóta að vera ansi örvæntingafullir ef þeir ætla mér að keppa í spjótkasti," sagði Delap. „Ég æfði spjótkast sem unglingur en hætti því þegar ég var 14 eða 15 ára gamall til að einbeita mér að knattspyrnu. Ég keppti fyrir hönd míns héraðs og var því örugglega ágætur í spjótkasti en ég veit nú ekki hvort ég hafi eitthvað að gera á Ólympíuleika."

Aron Einar Gunnarsson, leikmaður Coventry, hefur einnig vakið athygli fyrir sín löngu innköst en hann hefur áður greint frá því að sá hæfileiki sé að mestu leyti því að þakka að hann æfði handbolta á yngri árum.