Reading hoppaði úr fallsæti í það þrettánda

Þrír leikir fóru fram í ensku úrvalsdeildinni í dag. Liverpool vann öruggan 3-0 sigur á Newcastle og Reading gerði sér lítið fyrir og hoppaði upp um fimm sæti í stöðutöflunni.

Reading var í átjánda sæti fyrir leiki dagsins en þökk sé 1-0 sigri liðsins á Manchester City í dag er liðið nú í þrettánda sæti með 28 stig.

Reading hoppaði upp fyrir Newcastle sem tapaði enn einum leiknum í dag, í þetta sinn fyrir Liverpool á Anfield, 3-0.

Að síðustu náði Fulham að bjarga stigi gegn Blackburn með marki undir lok leiksins. Staða liðsins er þó erfið og þarf liðið nauðsynlega að vinna 2-3 leiki í röð til að bjarga sér frá falli.

Liverpool - Newcastle 3-0

1-0 Jermaine Pennant (43.)

2-0 Fernando Torres (45.)

3-0 Steven Gerrard (51.)

Javier Mascherano gat ekki leikið með Liverpool í dag vegna meiðsla og þá voru þeir Dirk Kuyt og Ryan Babel hvíldir. Yossi Benayoun, Jermaine Pennant og Lucas Leiva komu í liðið í þeirra stað.

Hjá Newcastle var eina breytingin frá síðasta leik liðsins sú að Charles N'Zogbia kom inn í liðið í stað Joey Barton sem má ekki stíga fæti í Liverpool vegna dómsúrskurðar.

Michael Owen var í byrjunarliði Newcastle og var vel tekið af stuðningsmönnum Liverpool. Það voru þó heimamenn sem voru mikið mun meira með boltann í upphafi leiksins.

Fernando Torres átti snemma ágætt skot að marki sem Steve Harper, markvörður Newcastle, varði vel.

Torres var svo aftur á ferðinni undir lok hálfleiksins er hann átti sendingu inn fyrir vörn Newcastle sem Jose Enrique reyndi að hreinsa í innkast. Það tókst ekki betur en svo en að hann skaut í Pennant og af honum fór boltinn yfir Harper og í markið - af ómögulegu færi í þokkabót.

Aðeins tveimur mínútum síðar átti Torres laglegan samleik við Steven Gerrard sem endaði með því að Torres fékk boltann í teig Newcastle, lék á Harper og skilaði knettinum í markið.

Til að bæta gráu á svart skoraði Gerrard þriðja mark Liverpool snemma í síðari hálfleik. Enn og aftur kom Torres við sögu en hann gaf boltann á Gerrard sem lyfti boltanum yfir Harper markvörð.

Gerrard komst svo nálægt því að skora fjórða mark Liverpool skömmu síðar en í þetta sinn sá Harper við honum.

Gerrard og Torres voru svo teknir af velli enda mikilvægur leikur hjá Liverpool framundan í Meistaradeildinni en eftir það gerðist lítið í leiknum. Helst var að varamaðurinn Obafemi Martins komst nálægt því að minnka muninn fyrir Newcastle en skot hans af 40 metra færi hafnaði í slánni.

Þar við sat og á Newcastle nú á hættu að blandast all verulega í fallbaráttuna en mjótt er á munum eins og stökk Reading sýndi í dag. Liðið er í fjórtánda sæti með 28 stig en öll liðin í 15.-18. sæti eiga leik til góða.

Reading - Manchester City 2-0

1-0 Shane Long (62.)

2-0 Dave Kitson (88.)

Steve Coppell, stjóri Reading, stillti upp sama liði og vann Middlesbrough um síðustu helgin en hjá City var Javier Garrido kominn í stöðu hægri bakvarðar en þetta var fyrsti leikur hans í byrjunarliði City síðan í desember.

Ívar Ingimarsson var í byrjunarliði Reading en Brynjar Björn Gunnarsson er enn frá vegna meiðsla.

City fékk fyrsta almennilega færið í leiknum er Vedran Corluka skaut yfir af mjög stuttu færi eftir fyrirgjöf Elano. Afar klaufalega gert hjá varnarmanninum.

Annar varnarmaður City, Richard Dunne, þurfti svo að vera borinn af velli eftir tæklingu Stephen Hunt en hún skildi eftir sig ljótt sár á fæti Dunne. Þar með átti Sven-Göran Eriksson engan alvöru miðvörð eftir í sínu liði.

City-menn vildu svo fá vítaspyrnu er Ívar virtist brjóta á Michael Johnson innan vítateigs en Uriah Rennie, dómari, var ekki á sama máli. Staðan var því markalaus í hálfleik.

Reading-menn mættu betur stemmdir til leiks í síðari hálfleik en Andre Bikey átti skot í slána snemma í síðari hálfleik. Aðeins tveimur mínútum síðar kom svo mark er Shane Long skoraði eftir laglegan samleik við Kevin Doyle.

Dave Kitson innsiglaði svo sigurinn með laglegu marki undir lok leiksins. Hann fékk boltann á hægri kantinum, lék á nokkra varnarmenn City og kláraði dæmið með laglegu skoti.

Þetta var þriðji leikurinn í röð þar sem City-mönnum tekst ekki að skora en liðið er nú í áttunda sæti deildarinnar með 45 stig.

Blackburn - Fulham 1-1

1-0 Morten Gamst Pedersen (60)

1-1 Jimmy Bullard (90.)

Tugay kom inn í lið Blackburn í stað Brett Emerton en Kasey Keller stóð í marki Fulham í stað Antti Niemi. Leon Andreasen tók svo stöðu Brian McBride í byrjunarliði Fulham.

Fyrri hálfleikur var afar tíðindinalítill en fyrsta markverða atvikið í leiknum var markið sem Norðmaðurinn Morten Gamst Pedersen skoraði fyrir heimamenn með skalla eftir fyrirgjöf Jason Roberts.

Allt leit út fyrir að Fulham ætlaði að tapa enn einum leiknum en þá skoraði Jimmy Bullard beint úr aukaspyrnu rétt undir lok leiksins.

Fulham á þó erfitt verkefni fyrir höndum en liðið er í næstneðsta sæti deildarinnar með 20 stig, sex stigum frá hinu mikilvæga sautjánda sæti deildarinnar.

Blackburn fór upp í sjöunda sæti deildarinnar með stiginu og er nú með 46 stig alls.