Þursaflokkurinn gefur út áður óþekkt efni

Margboðaðir tónleikar Þursaflokksins verða haldnir í Laugardalshöllinni þann 23. febrúar. Í tilefni tónleikanna verður gefið úr 5 diska sett með allri tónlist hljómsveitarinnar þar á meðal fimm lög sem ekki hafa heyrst opinberlega áður.

"Eigum við ekki að segja að Þursaflokkurinn hafi engu gleymt og ekkert lært," segir Tómas Tómasson bassaleikari Þursaflokksins en auk hans skipa sveitina þeir Egill Ólafsson, Þórður Árnason, Rúnar Vilbergsson, og Eyþór Gunnarsson sem tekur stöðu Karls heitins Sighvatssonar en þeir voru nánir vinir á sínum tíma.

Hvað lögin fimm varðar segir Tómas að þar séu á ferð upptökur sem gerðar voru fyrir plötuna Ókomin forneskjan sem Þursaflokkurinn vann að árið 1985 en aldrei komst í útgáfu.

"Á þessum fimm diskum sem við gefum út verður einn með lögunum og upptökum af æfingum og annað efni sem ekki hefur heyrst áður," segir Tómas.

Hann bætir því við að hann vilji að fyrirsögnin á þessari frétt sé "Bassaleikari á bömmer" því honum hafi verið boðið með ákaflega þjóðlegum hóp á þorrablót í Amsterdam sömu helgi og tónleikar Þursaflokksins fara fram. "Með í hóp þessum verða meðal annarra Guðmundur Pétursson, Pétur Grétarsson, Ragnhildur Gísladóttir, Steindór Andersen kvæðamaður og sjálfur allsherjargoðinn Hilmar Örn Hilmarsson. "Það er skelflegt að komast ekki með," segir Tómas og er gráti nær.