Innlent

„Þvottabrekkan sannaði sig sem tónleikastaður“

Nanna Hlín Halldórsdóttir skrifar
Um 30 þúsund tónleikagestir voru í Þvottabrekkunni þegar mest lét.
Um 30 þúsund tónleikagestir voru í Þvottabrekkunni þegar mest lét.

Ekki hefur farið framhjá mörgum að einhverjir þekktustu tónlistarmenn þjóðarinnar, Björk og Sigurrós ásamt fleirum, blésu til tónleika á laugardaginn undir yfirskriftinni Náttúra. Voru tónleikarnir haldnir í hinni svokölluðu Þvottabrekku í Laugardalnum en talið er að um 30 þúsund manns hafi verið þar þegar mest lét.

Reykjarvíkurborg tók þátt í framkvæmd tónleikanna en samkvæmt upplýsingum frá Sif Gunnarsdóttur hjá Höfuðborgastofu tókst framkvæmdin afar vel.

Tilefni tónleikanna var vitundarvakning varðandi umhverfisvernd og voru tónleikagestir meðal annars hvattir til þess að sleppa einkabílnum og nota í stað þess strætisvagna, hjól eða einfaldlega tvo jafnfljóta. Að sögn Sifjar virðast margir hafa tekið þá hvatningu til sín, ekki hafi verið um nein bílastæðavandamál að ræða né neitt verulegt umferðaröngþveiti.

,,Þvottabrekkan hefur sannað sig sem tónleikastaður," sagði Sif og benti á að Laugardalurinn væri afar miðsvæðis og góðar almenningssamgöngur í nánd við dalinn. ,,Þetta er fallegur staður og tréin sem umkringja svæðið gera það að verkum að það er meira logn en á mörgum öðrum stöðum," sagði Sif sem telur ekki eins mikla golu hafa verið í Þvottabrekkunni eins og á mörgum öðrum svæðum í borginni.

Ekkert umferðaöngþveiti myndaðist að ráði og sagðist Sif hafa séð strauma af fólki gangandi eftir Suðurlandsbrautinni bæði fyrir og eftir tónleika og einnig fulla strætisvagna af fólki. Hún benti einnig á að ókeypis hafi verið í sund í Laugardalslauginni sem og í Fjölskyldu-og húsdýragarðinum eftir tónleikana sem líklegast hafi valdið góðri dreifingu á brottför fólks úr dalnum.

Umræða hefur verið um mikið rusl á Náttúrutónleikunum. ,,Það er alveg augljóst mál að þegar 30 þúsund manns koma saman þá er eitthvað skilið eftir, því miður," sagði Sif. Minna rusl var þó en gert var ráð fyrir samkvæmt Sif og var búið að týna allt rusl á sunnudagsmorgninum.

Einhver röð skapaðist á salernin í Skautahöllinni en að sögn Sifjar var álitið vera nægjanlegur fjöldi salerna í Skautahöllinni, Laugardalshöllinni og Fjölskyldu-og húsdýragarðinum og því ekki talið þörf á aukasalernum. Kort af svæðinu var birt í fjölmiðlum fyrir tónleikana og reynt að merkja leið til salerna eftir fremsta megni. ,,Þetta er eitthvað sem verður alltaf umhugsunarefni á eftir kannski hefði mátt merkja betur en nóg var af klósettum," sagði Sif.







Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.