Eduardo gæti snúið aftur í nóvember

Arsene Wenger, knattspyrnustjóri Arsenal, segir að góðar líkur séu á því að Króatinn Eduardo da Silva snúi aftur í knattspyrnuvöllinn strax í næsta mánuði.

Eduardo er 25 ára gamall og meiddist afar illa í leik Arsenal gegn Birmingham í febrúar síðastliðnum. Martin Taylor, leikmaður Birmingham, tæklaði hann með þeim afleiðingum að hann ökklabrotnaði og fór illa úr lið á ökklanum.

Tæklingin leik það illa út að Sky-sjónvarpsstöðin ákvað að endursýna ekki atvikið í beinu útsendingunni frá leiknum.

Sjálfur hafði Eduardo sagt að hann vonaðist til að snúa aftur fyrir jól en Wenger hefur nú gefið til kynna að það gæti verið fyrr.