Björgólfur sparsamur í sumar

Enskir fjölmiðlar hafa eftir Björgólfi Guðmundssyni að hann ætli sér ekki að eyða miklum pening í leikmannakaup í sumar.

Björgólfur er eigandi West Ham sem og stjórnarformaður félagsins. Síðan hann keypti félagið í slagtogi við Eggert Magnússon fyrir tveimur árum hefur félagið eytt miklu í leikmannakaup og laun leikmanna en nú horfir annað við.

Hann telur að Alan Curbishley hafi yfir sterkum og reyndum hópi leikmanna að ráða.

„Ég var ánægður með tímabilið og það veitir okkur tækifæri til að taka næsta skref," er haft eftir Björgólfi. „Auðvitað finnst mér, rétt eins og Alan, afar pirrandi að svo margir leikmenn hafa verið frá vegna meiðsla. En við teljum báðir að leikmenn þurfi að fá tækifæri til að ná saman inn á vellinum auk þess sem að ungir leikmenn fái áfram tækifæri."