Margir leikmenn orðaðir við Tottenham

Svo virðist sem Tottenham sé oft það lið sem oftast er þungamiðjan í slúðrinu þegar leikmannamarkaðir á Englandi opna. Liðið hefur enda verið duglegt að versla undanfarin ár.

Janúarglugginn í ár er engin undantekning og ekki minnkar slúðrið í kring um liðið eftir að Harry Redknapp tók við liðinu, enda tekur hann við búi Juande Ramos sem var með allt aðra aðferðafræði.

Talið er víst að markvörðurinn Heurelho Gomes verði fyrsti maðurinn út um dyrnar þegar janúarglugginn opnast og Redknapp viðurkenndi í gær að vel gæti verið að hann myndi kaupa markvörð þó Gomes hafi rétt úr kútnum að undanförnu.

Svo gæti jafnvel farið að fyrrum vinnuveitendur Gomes í PSV í Hollandi myndu reyna að fá Brasilíumanninn aftur í sínar raðir, en það yrði þá væntanlega með einhverjum afslætti frá þeim rúmu átta milljónum punda sem hann kostaði Tottenham í sumar.

News of the World er fullt af félagaskiptaslúðri um Tottenham í dag og þar segir að Harry Redknapp ætli sér að ná í markvörðinn Robert Green og varnarmanninn Matthew Upson frá sínu gamla félagi West Ham.

Einnig ku hann vera að undirbúa tilboð í Michael Owen frá Newcastle og þá mun hann ætla að reyna að fá Joe Cole frá Chelsea, en þeir unnu saman þegar þeir voru saman hjá West Ham á sínum tíma. Lítið gengur í samningaviðræðum Cole og Chelsea og því er talið að Redknapp reyni að ná í hann í janúar eða næsta sumar.