Golfmót til styrktar hjartveikum börnum

Þann 25. júní næstkomandi gefst kylfingum einstakt tækifæri til að láta gott af sér leiða í þágu hjartveikra barna. Þá verður spilað golf til góðs á fimm golfvöllum á Reykjavíkursvæðinu. Að auki fer Stjörnugolf Nova fram í fimmta sinn á Urriðavelli í Garðabæ þar sem 20 þjóðþekktir Íslendingar taka þátt. Allt söfnunarfé rennur óskipt til Neistans, styrktarfélags hjartveikra barna.

Innifalið í þátttökugjaldi er vallargjald fyrir tvo keppendur, teiggjafir, veitingar fyrir golf, matur, drykkir og skemmtun að golfi loknu. Skráning í Stjörnugolf Nova fer fram á stjornugolf@visir.is og þarf að koma fram nafn fyrirtækis, kennitala, þátttakendur og forgjöf. Nánari upplýsingar um mótið má finna hér.

Hér á landi greinast um 70 börn á ári með hjartagalla og þarf tæplega helmingur þeirra að gangast undir aðgerð af einhverju tagi. Mörg barnanna þurfa að gangast ítrekað undir aðgerðir erlendis og hleypur kostnaðurinn á hverja fjölskyldu á hundruðum þúsunda og allt upp í nokkrar milljónir.

„Það er mikið áfall fyrir fjölskyldur þegar börn greinast með hjartagalla. Þrátt fyrir að hið opinbera taki þátt í kostnaðinum sem fylgir aðgerðum, þá dugar það engan veginn fyrir heildarútgjöldum sem felast í umönnun, ferðalögum og vinnutapi sem dæmi," segir Guðrún Bergmann Franzdóttir, formaður Neistans.

Neistinn er því mikilvæg lífæð fyrir fjölskyldur hjartveikra barna. Allt söfnunarféð úr Stjörnugolfi Nova - Golf til góðs! rennur óskipt í Styrktarsjóð hjartveikra barna.

Bergur Leon Bjarnason er þriggja ára strákur úr Keflavík. Hann er hjartveikur og styrktur af Neistanum. Foreldrar hans halda úti bloggsíðu um baráttu hans hér á Vísi. Slóðin á bloggið er blogg.visir.is/bergurstjornugolf.