Eggert enn og aftur færður til

Svo gæti farið að Eggert Gunnþór Jónsson verði settur í stöðu vinstri bakvarðar þegar að Hearts mætir Celtic í skosku úrvalsdeildinni á laugardaginn.

Csaba Laszlo, ungverski knattspyrnustjóri Hearts, á í vandræðum með þá stöðu þar sem að eini vinstri bakvörðurinn í leikmannahópi félagsins, Lee Wallace, verður í leikbanni um helgina.

Eggert hefur þegar gegnt fjölmörgum stöðum í liði Hearts á þessu tímabili. Hann hefur oftast spilað sem hægri bakvörður en einnig sem miðvörður, miðjumaður og á hægri kantinum.

Wallace átti að taka út leikbannið um síðustu helgi en þá var leik Hearts gegn Motherwell frestað. Bannið færist því yfir á leikinn gegn Celtic.