Dennis getur spilað með FH gegn Breiðabliki

Dennis Siim er óheimilt að taka út leikbann í leik FH og Breiðabliks á næstkomandi miðvikudag er liðin mætast í frestuðum leik.

Siim fékk áminningu í leik FH og Vals í 19. umferð Landsbankadeildar karla þann 13. september síðastliðinn. Það var hans fjórða gula spjald á leiktíðinni og hann hefði átt að vera í leikbanni í leik FH og Keflavíkur í gær.

Hins vegar urðu mannleg mistök til þess að áminningin fór ekki inn í gagnagrunn KSÍ og það uppgötvaðist ekki fyrr en fjallað var um málið í Landsbankamörkunum á Stöð 2 Sporti í gær.

„Það er líklegt að um mannleg mistök hafi verið að ræða," sagði Þórir Hákonarson, framkvæmdarstjóri KSÍ, í samtali við Vísi. „Kannski datt kerfið eitthvað út eða eitthvað því líku. En nú verður það leiðrétt og tekið fyrir á fundi nefndarinnar."

Aga- og úrskurðarnefnd KSÍ fundar á morgun þar sem Siim verður úrskurðaður í eins leiks bann vegna mistakanna.

Hins vegar er honum beinlínis óheimilt að taka út leikbannið í leik Breiðabliks og FH á miðvikudaginn þar sem úrskurðir aganefndar taka ekki gildi fyrr en á hádegi á föstudeginum eftir fundinn.

„Úrskurðir aga- og úrskurðarnefndar skulu almennt taka gildi við uppkvaðningu þeirra eða eins og nánar greinir í úrskurðarorði. Úrskurðir nefndarinnar varðandi agamál taka hins vegar gildi kl. 12 á hádegi næsta föstudag frá birtingu þeirra. Óheimilt er að taka út viðurlög í agamálum áður en úrskurðir taka gildi, nema um sjálfkrafa leikbann sé að ræða," segir í reglugerð KSÍ um aga- og úrskurðarmál, þriðja kafla, níundu grein.

Þórir segir einfalt mál hvað hafi gerst en Jóhannes Valgeirsson, dómari leiks FH og Vals, sendi inn rétta skýrslu til KSÍ með áminningunni hans Siim.

„Skýrslurnar eru forskrifaðar af félögunum og farið svo yfir þær hjá KSÍ. Þau mistök voru gerð að spjaldið sem var í leikskýrslunni hjá dómaranum var ekki skráð í gagnagrunninn."

Keflavík er heimilt að kæra málið þar sem FH notaði leikmann í gær sem með réttu hefði átt að vera í leikbanni. FH braut þó ekki af sér, þar sem ekki var búið að úrskurða Siim í leikbann og leikmönnum er óheimilt að taka út leikbann öðruvísi en eftir að úrskurður tekur gildi.

Siim hefur þó fengið tvö gul spjöld síðan að aga- og úrskurðarnefnd fundaði síðast og verður því alls kominn með sex áminningar eftir að áðurnefnd mistök verða leiðrétt.

Siim fékk gult í leik Fram og FH á miðvikudagskvöldið og svo aftur í leiknum gegn Keflavík í gær.

Samkvæmt því verður hann því úrskurðaður í eins leiks bann fyrir fyrstu fjögur gulu spjöldin og svo í annað leikbann fyrir sjötta gula spjaldið sitt. Hann mun því ekki geta tekið út síðara leikbannið fyrr en í upphafi næstu leiktíðar.