FH án Tryggva og Dennis gegn Fylki

Tryggvi Guðmundsson mun missa af leik Fylkis og FH í lokaumferð Landsbankadeildar karla þar sem hann fékk sitt fjórða gula spjald á leiktíðinni í leik FH og Keflavíkur í gær.

Tryggvi verður væntanlega úrskurðaður í leikbann á fundi Aga- og úrskurðarnefndar KSÍ á morgun og tekur bannið fyrst gildi á föstudaginn. Hann getur því verið með FH í leiknum gegn Breiðabliki á miðvikudaginn.

Kristinn Jakobsson, dómari leiks FH og Keflavíkur, staðfesti í samtali í Vísi í dag að Tryggvi hafi fengið áminningu í gær fyrir óíþróttamannslega framkomu og fyrir að ögra leikmönnum Keflavíkur.

Tryggvi fagnaði sigurmarki Atla Viðars Björnssonar í gær fyrir framan leikmenn Keflavíkur sem voru allt annað en ánægðir með framgöngu Tryggva.

Ef FH vinnur Breiðablik á miðvikudaginn þarf liðið nauðsynlega á sigri að halda gegn Fylki í lokaumferðinni til að eiga möguleika á Íslandsmeistaratitlinum. Tryggvi mun því missa af þeim mikilvæga leik.

Tryggvi fékk sína þriðju áminningu í sumar fyrir að lyfta upp treyju sinni eftir að hann skoraði sitt síðara mark í leik FH og Vals í 19. umferðinni. Það var hans 100. mark og klæddist hann sérmerktum bol af því tilefni.

Þá mun Dennis Siim einnig taka út leikbann fyrir fjögur gul spjöld í þessum sama leik.