Frávísun í skattsvikamáli Jóns Ólafssonar kærð til Hæstaréttar

Úrskurður Héraðsdóms Reykjavíkur um að vísa frá ákæru gegn Jóni Ólafssyni, Hreggviði Jónssyni og Ragnari Birgissyni verður kærður til Hæstaréttar. Þetta segir Helgi Magnús Gunnarsson, saksóknari efnahagsbrota hjá Ríkislögreglustjóra. Helgi Magnús segir að niðurstaða Héraðsdóms sé hvorki í samræmi við dóma Mannréttindadómstólsins né dóma Hæstaréttar Noregs í sambærilegum málum. „Við höfum verið með hundruði mála þar sem sama aðstaða er uppi og það hefur aldrei leitt til frávísunar," segir Helgi Magnús í samtali við Vísi.

Efnahagsbrotadeild Ríkislögreglustjóra gaf út ákæru á hendur mönnunum fyrr á árinu en þeim er gefið að sök að hafa svikið hundruð milljóna króna undan skatti í tengslum við rekstur Norðurljósa og tengdra félaga. Ákærðu kröfðust frávísunar á grundvelli þess að tilgangur saksóknar í máli þessu væri að refsa ákærðu öðru sinni með dómi fyrir þá hina sömu háttsemi sem þeim hafi þegar verið gerð refsing fyrir með álagningu skattaálags. Ríkisskattstjóri hafi þegar endurákvarðað ákærðu gjöld og í samræmi við lagafyrirmæli og lagaframkvæmd reiknað 25% álag á skattstofna í refsiskyni.