Leikmaður rekinn frá Walsall

Enska C-deildarliðið Walsall hefur rekið einn leikmann úr sínum röðum, hinn tvítuga Ishmel Demontagnac, eftir að hann var handtekinn um helgina.

Demontagnac var handtekinn á sunnudagsmorgun fyrir óspektir en sleppt án kæru. Walsall sagði að hann hefði svo verið rekinn frá félaginu fyrir alvarleg brot á agareglum.

Hann kom síðast við sögu hjá liði félagsins á laugardaginn er Walsall mætti Scunthorpe í ensku bikarkeppninni. Aðeins átta mínútum eftir að hann kom inn á sem varamaður fékk hann að líta rauða spjaldið.

Jimmy Mullen, knattspyrnustjóri Walsall, gagnrýndi Demontagnac og sagði að hann hefði brugðist liðsfélögum sínum.

„Hann býr yfir miklum hæfileikum og er enginn vafi um það. Ég hef sagt það áður og segi það enn að hann á fullt erindi í úrvalsdeildina."

„En það býr greinilega eitthvað í hans persónu sem veldur því að svo er ekki."

Mullen sagði enn fremur að atvikið um helgina hafi reynst síðasta hálmstráið. „Félaginu fannst að nú væri bara komið nóg."

Demontagnac hefur leikið bæði með U-18 og U-19 landsliðum Englands.