Meira að frétta á næstu tveimur vikum

Cristiano Ronaldo segir að frekara fregna sé að vænta af framtíðarmálum hans á næstu tveimur vikum.

Ronaldo hefur margoft verið orðaður við Real Madrid eftir að forseti félagsins, Ramon Calderon, sagðist vilja fá hann. Sjálfur hefur Ronaldo oft sagt að hann vilji spila á Spáni.

En Ronaldo hefur einnig sagt margoft undanfarið að hann ætli sér að vera áfram hjá Manchester United. Þegar hann kom hins vegar til Lissabon í dag gaf hann í skyn að það væri ekkert ákveðið í þeim efnum.

„Ég hef ekkert að gera með Real Madrid," sagði Ronaldo. „Ég er með samning við Manchester United og mun ræða við mitt félag. Það gæti verið eitthvað meira að frétta á næstu tveimur vikum."

Hann sagði einnig að það væri vissulega draumur að verða Evrópumeistari með Portúgal en EM hefst þann 7. janúar næstkomandi.

„Þetta er vissulega fjarlægur draumur en við munum taka einn leik fyrir í einu. Fyrsti leikurinn í riðlakeppninni verður gríðarlega mikilvægur."