Samningstilboð Lahm dregið til baka

Framtíð þýska landsliðsmannsins Philipp Lahm hjá Bayern Munchen virðist nú vera upp í loft eftir að félagið tók samningstilboð til hans út af borðinu.

Á heimasíðu Bayern er yfirlýsing þar sem fram kemur að slitnað hafi upp úr viðræðum. Samningur Lahm rennur út þarnæsta sumar og því virðist líklegt að liðið sé að hugsa um að selja hann nú í sumar.

Lahm lýsti því sjálfur yfir fyrir helgi að ekki væri útilokað að hann færi frá félaginu. "Ég spilaði tvö ár hjá Stuttgart og nú er ég að klára þriðja árið mitt hjá besta liði Þýskalands, svo það er ekki nema eðlilegt að næsta skref sé að prófa að leika utan Þýskalands," sagði Lahm.