Gallas tæpur á morgun

Franski varnarmaðurinn William Gallas verður tæplega með Arsenal á morgun þegar liðið sækir Stoke heim í ensku úrvalsdeildinni.

Að sögn Arsene Wenger er Gallas meiddur í aftanverðu læri og því þykir líklegt að Kolo Toure taki stöðu hans í miðri vörn liðsins á morgun við hlið Mikael Silvestre.

Bresku slúðurblöðin segja að Wenger hafi reyndar hellt sér yfir varnarmenn sína eftir 4-4 jafnteflið gegn Tottenham í miðri viku þar sem liðið fékk á sig tvö mörk í blálokin og kastaði frá sér sigrinum.

Þá mun Emmanuel Eboue vera meiddur á hné og óvíst er hvort hann geti komið við sögu á morgun.