Breskir fjölmiðlar sitja um Garðar Cortes

„Það má segja að við komumst ekki áfram með upptökurnar vegna ágangs fjölmiðla!," segir Einar Bárðarson, umboðsmaður Íslands. Sunday Times heimsótti Garðar Cortes í hljóðver í dag, þar sem hann er að ljúka vinnslu á næstu plötu sinni. Breskir fjölmiðlar eru greinilega hrifnir af tenórnum sjarmerandi, en NOW tímaritið heimsækir Garðar á miðvikudaginn, og á fimmtudag verður birt stórt viðtal við hann í Daily Telegraph.

Síðasta plata Garðars, Cortes, hlaut mikla athygli í Bretlandi og er meðal annars tilnefnd til Bresku tónlistarverðlaunanna, sem verða afhent í Royal Albert Hall þann 8. maí næstkomandi. Platan sem hann vinnur að nú er væntanlega í verslanir í Bretlandi og á Íslandi í lok júní.