Ferdinand styður hert lyfjaeftirlit

Varnarmaðurinn Rio Ferdinand hjá Manchester United hefur lýst yfir stuðningi yfir það herta lyfjaeftirlit sem fyrirhugað er í ensku úrvalsdeildinni.

Stefnt er á að hrinda þessu aukna eftirliti í framkvæmd á næstu leiktíð og myndi það þýða að leikmenn yrðu undir stífara eftirliti en áður hefur þekkst. Það myndi skipa þeim á bekk með öðrum íþróttamönnum ss eins og frjálsíþróttamönnum.

Gordon Taylor, yfirmaður samtaka atvinnuknattspyrnumanna hefur þegar lýst yfir andstöðu við þessar hertu reglur, en Ferdinand styður aðgerðirnar.

"Þetta hljómar sanngjarnt og ef það kemur okkur á sama plan og öðrum íþróttamönnum, er ég fylgjandi því. Við förum allir í þrjú eða fjögur próf á ári hvort sem er. Ef ráðamenn telja að rétt sé að gera þetta svona - þá er um að gera það," sagði Ferdinand.

Ferdinand fór sjálfur í átta mánaða keppnisbann árið 2003 fyrir að skrópa í lyfjapróf.