Emre á leið til Fenerbahce

Eftir því sem fram kemur á heimasíðu Fenerbahce hefur félagið komist að samkomulagi við Newcastle um kaup á tyrkneska miðvallarleikmanninum Emre Belozoglu.

Emre fór frá Inter til Newcastle árið 2005 fyrir fjórar milljónir punda en hefur aldrei náð að láta ljós sitt skína þar. Þar áður lék hann með Galatasaray en hann sló í gegn á HM 2002 er Tyrkir náðu þriðja sæti.

Newcastle hefur ekki staðfest þetta en talið er að kaupverðið nemi átta milljónum punda.

Emre er samningsbundinn Newcastle til 2011 en hann hefur skorað fimm mörk í 58 leikjum fyrir félagið.