Ótrúleg endurkoma hjá Liverpool - Tottenham sekkur enn

Dramatíkin var í hámarki í ensku úrvalsdeildinni í knattspyrnu í dag. Liverpool lagði Manchester City 3-2 á útivelli eftir að hafa lent undir 2-0 og öskubuskulið Hull sökkti Tottenham enn dýpra á botninn.

Manchester City byrjaði mjög vel á móti Liverpool og hafði yfir 2-0 í hálfleik með mörkum Stephen Ireland og Javier Garrido á 19. og 42. mínútu.

Fernando Torres klóraði í bakkann fyrir gestina á 55. mínútu og á 67. fékk Pablo Zabaleta hjá City að líta rauða spjaldið. Það var vatn á myllu Liverpool, sem nýtti sér liðsmuninn. Fernando Torres jafnaði leikinn sex mínútum síðar og það var svo Hollendingurinn Dirk Kuyt sem tryggði þeim rauðu sigurinn með marki á 90. mínútu.

Nýliðar Hull City drógu enn eitt kraftaverkið upp úr poka sínum í norðurhluta Lundúna þegar þeir skelltu heillum horfnu liði Tottenham 1-0 á White Hart Lane. Það var hinn ótrúlegi Geovanni sem var hetja liðsins enn á ný þegar hann skrúfaði aukaspyrnu í bláhornið eftir aðeins 8 mínútna leik.

Tottenham er sem fyrr jarðað á botni deildarinnar og ekkert annað en fallbarátta bíður liðsins á næstunni. Ljóst er að þessi úrslit verða ekki til að styrkja stöðu Juande Ramos knattspyrnustjóra og áhorfendur á White Hart Lane bauluðu sína menn af velli enn einu sinni.

Chelsea heldur áfram góðu gengi sínu og í dag vann liðið verðskuldaðan 2-0 sigur á Aston Villa. Joe Cole og Nicolas Anelka skoruðu mörk Chelsea í fyrri hálfleik.

Portsmouth lagði nýliða Stoke City 2-1 á heimavelli. Peter Crouch og Jermain Defoe skoruðu mörk Portsmouth sem veitti ekki af sigrinum eftir fremur dapurt gengi að undanförnu. Hermann Hreiðarsson var á bekknum hjá Portsmouth í dag og kom inn sem varamaður í blálokin.

Í lokaleik dagsins náði svo Newcastle jafntefli við Everton á útivelli 2-2 eftir að hafa lent undir 2-0. Þetta var fyrsti leikur Joe Kinnear sem settur stjóri Newcastle. Everton komst í 2-0 með mörkum Mikel Arteta (víti) og Marouane Fellaini, en Steven Taylor og Damien Dufff jöfnuðu leikinn fyrir Newcastle, sem náðu sér í dýrmæt stig í botnbaráttunni.

Chelsea er á toppi deildarinnar með 17 stig líkt og Liverpool sem er í öðru sæti. Hull City er komið í þriðja sæti með 14 stig, stigi á undan Arsenal og Aston Villa.