Evra framlengdi samning sinn við United

Patrice Evra hefur skrifað undir fjögurra ára framlengingu á samningi sínum við Manchester United og verður hjá félaginu til 2012.

Evra kom frá Mónakó árið 2006 og átti mjög góðu gengi að fagna á nýliðnu tímabili er United varð bæði enskur meistari sem og Evrópumeistari.

Rio Ferdinand, Wes Brown, Nemanja Vidic og Michael Carrick hafa allir nýverið framlengt samninga sína við United.

„Patrice hefur verið lykilmaður í góðum árangri félagsins undanfarin tvö ár," sagði Alex Ferguson, stjóri United. „Hann er í dag orðinn einn besti bakvörður heims."