Ranieri: Del Piero var frábær

Claudio Ranieri, þjálfari Juventus, var að vonum ánægður með 2-0 sigur sinna manna á Real Madrid á Spáni í Meistaradeildinni í kvöld. Hann hrósaði markaskoraranum Alessandro del Piero í hástert eftir að hann skoraði bæði mörk ítalska liðsins í kvöld.

"Del Piero var frábær í kvöld, en það var ekki í fyrsta skipti. Fyrirliðinn er að skemmta sér vel þessa dagana og hefur tekið liðið á herðar sér. Það besta við Del Piero er að hann hjálpar liðinu og fórnar sér fyrir liðið eins og sannur fyrirliði. Það er ekki gefið að koma hingað á Bernabeu og vinna 2-0," sagði Ranieri ánægður.

Þetta var fyrsti útisigur Juventus á Real Madrid í Evrópukeppni í 62 ár.