Cheney og Gonzales ákærðir vegna misþyrminga í fangelsum

Kviðdómur í Willacy-sýslu í suðurhluta Texas hefur gefið út ákæru á hendur Dick Cheney, varaforseta landsins, og Alberto Gonzales, fyrrverandi dómsmálaráðherra, vegna misþyrminga sem fangar sæta í einkareknum fangelsum.

Í ákærunni er vísað til tengsla Cheney við fyrirtæki sem reki fangelsi í sýslunni og er hann sakaður um hagsmunaárekstra vegna þessa. Er Cheney ákærður fyrir að hagnast á því að fólk sé svipt frelsinu og Gonzales fyrir að misnota aðstöðu sína sem dómsmálaráðherra til að stöðva rannsóknir á ofbeldi í fangelsum í sýslunni.

Ekki er búið að þingfesta ákæruna fyrir dómi í sýslunni og þá mun skrifstofu varaforsetans ekki hafa borist ákæran. Lögmaður Gonzales sagði hins vegar ákæruna bull og að um væri að ræða misnoktun á dómskerfinu.

Ákæran er gefin út í kjölfar þess að fangi lést í fangelsi í Willacy-sýslu árið 2001 eftir að samfangar hans höfðu lamið hann. Fyrirtækið sem rak fangelsið, GEO, var ákært vegna málsins og var það dæmt til að greiða fjölskyldu fangans himinháar bætur.