Getum gert eins og Celtic

Stephen McManus er fyrirliði Celtic og lykilmaður í skoska landsliðinu. Hann segir að skoska landsliðið geti gert eins og Celtic þegar liðið varð meistari í vor.

Skotland tapaði sínum fyrsta leik í undankeppni HM 2010 fyrir Makedóníu um helgina og George Burley, þjálfari liðsins, hefur mátt þola mikla gagnrýni skoskra fjölmiðla fyrir.

McManus veit hins vegar að nóttin er ekki úti enn. Á síðasta keppnistímabili var Celtic lengi vel á toppi skosku úrvalsdeildarinnar en þegar liðið átti sjö leiki eftir var það sjö stigum á eftir Rangers sem átti þar að auki leik til góða. Það voru miklar vangaveltur um framtíð Gordon Strachan knattspyrnustjóra liðsins á þeim tíma og talið nánast víst að hann myndi ekki halda áfram með liðið á næstu leiktíð.

En þá vann Celtic sjö síðustu leiki tímabilsins, þar af Rangers tvisvar, og vann á endanum skoska meistaratitilinn, þriðja árið í röð. Strachan hélt vitanlega starfi sínu.

„Allir virðast halda að leikmönnum sé alveg sama þegar þeir tapa leikjum. Þá fara allir að gagnrýna liðið og leikmennina sem aldrei fyrr. En trúið mér, allir eru jafn slegnir yfir úrslitum helgarinnar. Við bara trúðum því ekki að við fengum ekkert úr leiknum því Makedónía er varla með besta lið í heimi."

„Við fengum slæmt mark á okkur en náðum okkur á strik. Það var því enn verra þegar við þurftum að sætta okkur við tapið. Maður vill leiðrétta slík mistök sem allra, allra fyrst."

„Svona er fótboltinn. Það eina sem má stóla á í fótboltanum að stundum gengur allt á afturfótum, annað hvort hjá leikmanninum sjálfum eða liðinu öllu. Maður gleymir því hins vegar aldrei. Það festist í huga manns."

„Þetta var svipað á síðasta tímabili með Celtic þegar allir voru búnir að afskrifa okkur. Allir létu okkur fá það óþvegið og það jafnast ekkert á við að geta staðið beinn í baki þegar á endann er komið."

Skotar eiga sjö leiki eftir í riðlakeppninni og vinni liðið alla þessa leiki er nokkuð ljóst að liðið kemst þannig á HM. En Skotar sætta sig við að byrja á sigri á Laugardalsvelli í kvöld.