Þrír leikmenn á leið frá Portsmouth

Sean Davis, Lauren og Milan Baros gætu allir hafa leikið sinn síðasta leik fyrir Portsmouth en enginn þeirra lét sjá sig í sigurhátíð leikmanna liðsins í Portsmouth á sunnudaginn.

Leikmenn fögnuðu þá enska bikarmeistaratitlinum sem Portsmouth vann eftir sigur á Cardiff í úrslitaleik á laugardaginn.

Davis og Lauren voru hvorugur í sextán manna leikmannahópi Portsmouth þó svo að báðir höfðu spilað reglulega með liðinu í vor en Baros kom inn á sem varamaður fyrir Kanu á 87. mínútu. Kanu skoraði sigurmark leiksins.

Baros er á láni frá franska félaginu Lyon en Portsmouth hefur þann möguleika að kaupa hann. Baros hefur ekki náð að skora í þeim sextán leikjum sem hann hefur komið við sögu með Portsmouth.

Peter Storrie, framkvæmdarstjóri Portsmouth, staðfesti að hann myndi skoða framtíð þessara leikmanna sem og annarra í samstarfi við Harry Redknapp, knattspyrnustjóra liðsins.