Óstöðugleiki fer í taugarnar á Wenger

Arsene Wenger stjóri Arsenal horfði upp á sína menn tapa 2-0 fyrir Aston Villa á heimavelli í ensku úrvalsdeildinni í dag. Skömmu áður hafði liðið lagt Manchester United á heimavelli en allt annað var að sjá til liðsins í dag.

Óstöðugleiki hefur verið helsti óvinur Arsenal liðsins í vetur. Það hefur átt það til að spila frábæra knattspyrnu, en sekkur niður í meðalmennsku inn á milli.

"Þetta var slæmur dagur fyrir okkur. Við vorum hvergi nærri nógu frískir og áttum undir högg að sækja alls staðar á vellinum í fyrri hálfleik. Villa var betra liðið í leiknum. Þetta er gremjulegt því við spiluðum ekki á þeim hraða sem ég hafði óskað. Við getum spilað mjög vel en við verðum að ná upp stöðugleika í spilamennsku okkar."

"Stöðugleiki er fyrsta merki góðra liða og því var ég mjög svekktur með þennan leik eftir að við náðum sigri gegn Manchester United," sagði Wenger.