Bjargvættur Víkinga tekur fram skóna í kvöld

Það verður mikið um dýrðir á vallarsvæði Víkings í Fossvoginum í kvöld en þá mun Björn Bjartmarz klæðast Víkingsbúningnum á nýjan leik. Björn er lifandi goðsögn hjá Víkingum eftir að hafa tryggt þeim Íslandsmeistaratitilinn 1991.

Bjargvætturinn, eins og Björn er kallaður, mun leika með Berserkjum, varaliði Víkings, sem tekur á móti KFR í 3. deildinni. Heljarinnar umgjörð verður í kringum þennan leik en Víkingar munu slá upp veislu.

„Það verður allt lagt upp með að ég skori í kvöld. Ég er búinn að tala við strákana og þeir vita alveg á hvern þeir eiga að gefa. Ég er búinn að þjálfa þá alla svo þeir þora ekki öðru en að hlýða," sagði Björn sem orðinn er 46 ára. Hann átti magnaða innkomu gegn Víði í Garði 1991 og skoraði markið sem færði Víkingum titilinn.

Hann hóf að þjálfa 1988 og hefur gert það síðan. Hann er því einnig að halda upp á 20 ára þjálfunarafmæli sitt en nær allir leikmenn Berserkja hafa verið undir hans leiðsögn.

„Ég veit ekki hvernig byrjunarliðið verður en ég allavega rétt slapp í hópinn. Þetta verður virkilega skemmtilegt og heljarinnar hátíð. Við vonumst eftir góðri mætingu en það er allavega góð stemning í hverfinu," sagði Björn við Vísi.

„Ég bara man ekki hvenær ég lagði skóna á hilluna, það er svo rosalega langt síðan. Formið er ekkert sérstakt í dag. Ég hef verið aðeins meiddur í hnénu svo ég hef ekki getað æft á fullu."

Björn Bjartmarz mun koma með sitt eigið starfslið á bekkinn en liðstjórar verða fyrrverandi leikmennirnir Atli Einarsson og Aðalsteinn Aðalsteinsson. Læknir verður Víkingslæknirinn til margra ára, Gunnar Rúnar Sverrisson.

Hvergi er til sparað við umgjörðina á leiknum og mun Kristinn Jakobsson, okkar færasti dómari, vera með flautuna. Reyndasti aðstoðardómarinn í bransanum Einar K. Guðmundsson verður á annari línunni og fyrrverandi FIFA-aðstoðardómarinn Haukur Ingi Jónsson á hinni.

Leikurinn hefst klukkan 19:00 í kvöld en klukkutíma áður hefst dagskráin á Víkingsvelli. Grillað verður fyrir leik og mun meistaraflokkur karla hjá Víkingi sjá um að grilla ofan í liðið. Leikmenn úr meistaraflokki HK/Víkings í kvennaflokki munu svo ganga á undan liðunum inn á völlinn. Eftir leik verður svo mikið skrall í Víkinni.

Þess má geta að Berserkjum hefur gengið mjög vel í 3. deildinni það sem af er sumri og trjóna á toppi síns riðils. Tvö efstu liðin í lok sumars munu fara í umspilið um sæti í 2. deild.

Myndbönd frá því þegar Víkingur varð meistari 1991:

Björn Bjartmarz kemur Víkingi yfir 2-1

Björn Bjartmarz kemur Víkingi í 3-1

Fagnaðarlætin þegar titillinn var í höfn