Vill lífstíðarbann fyrir hættulegar tæklingar

Sepp Blatter, forseti Alþjóða knattspyrnusambandsins, vill dæma þá leikmenn sem stofna öðrum leikmönnum í hættu í lífstíðarbann.

Eitthvert ljótasta brot síðari ára leit dagsins ljós þegar að Martin Taylor, leikmaður Birmingham, braut á Eduardo, leikmanni Arsenal, með þeim afleiðingum að ökklinn afmyndaðist afar mikið. Eduardo verður frá í að minnsta kosti níu mánuði.

„Hættulegar tæklingar er eitt mikilvægasta málefnið í knattspyrnunni þessa stundina," sagði Blatter í samtali við Telegraph. „Þeir leikmenn sem verða uppvísir að slíkum tæklingum viljandi á að útiloka frá íþróttinni."

Blatter segir að það eigi jafnvel að sækja viðkomandi til saka. „Það er glæpsamlegt að ráðast á einhvern. Hvort sem það gerist á knattspyrnuvellinum eða annars staðar. Það er glæpsamlegt og á að meðhöndla sem slíkt."

Stjórn FIFA mun funda um helgina þar sem þetta mál verður meðal þess sem rætt verður.