Helst hætta á hryðjuverkum við sendiráð

Greiningardeild ríkislögreglustjóra telur að möguleg skotmörk hryðjuverkamanna á Íslandi geti verið ferðamenn eða sendiráð erlendra ríkja.

Árás á erlend fyrirtæki á Íslandi gæti einnig í huga hryðjuverkamanna falið í sér vel heppnaða atlögu að hagsmunum einhvers ríkis sem þeir hatist við. Þá sé unnt að valda mjög alvarlegum áföllum með árásum á tölvukerfi t.d veitustofnana, fjármálafyrirtækja og stjórnarráðsins.

Samkvæmt mati greiningardeildar er hætta á hryðjuverkum hér á landi lítil og ekki séu fyrirliggjandi sérstakar upplýsingar um að verið sé að skipuleggja eða undirbúa hryðjuverkaaðgerðir gegn skotmörkum eða viðburðum hérlendis.

Í skýrslu greiningardeildarinnar um hættu á hryðjuverkum hér á landi segir að aukin alþjóðleg hryðjuverkastarfsemi og greiðari för fólks milli landa hafi í för með sér aukna hættu á að hérlendis verði framin hryðjuverk eða fram fari undirbúningur hryðjuverkaárása í öðrum löndum. Ísland og íslenskir hagsmunir gætu orðið fyrir alvarlegum skaða ef hérlendis færi fram undirbúningur að hryðjuverki í öðru landi eða rekja mætti árásir til þess að íslensk stjórnvöld hefðu ekki sinnt alþjóðlegum skuldbindingum um aðgerðir gegn hryðjuverkastarfsemi.

Bent er á fjölda hryðjuverkaárása frá því að árásirnar á Bandaríkin dundu yfir árið 2001 og sömuleiðis að komið hafi verið í veg fyrir fjölda hryðjuverka á undanförnum árum svo sem í Bretlandi, Danmörku og Þýskalandi. „Ljóst er að hryðjuverk geta átt sér stað á Íslandi og einnig undirbúningur og skipulag hryðjuverka gagnvart öðrum löndum," segir greiningardeildin í skýrslunni.