Pique á leið aftur til Barcelona

Spænskir fjölmiðlar halda því fram í dag að varnarmaðurinn Gerard Pique sé á leið aftur til Barcelona frá Manchester United.

Pique, sem er 21 árs, lék á yngri árum með unglingaliðum Barcelona en var seldur til Manchester United árið 2004. El Mundo Deportivo hélt því fram í morgun að Barcelona væri þegar búið að semja um kaup og kjör við Pique og að samningur yrði undirritaður í næstu viku, eftir úrslitaleikinn í Meistaradeild Evrópu.

Kaupverðið er talið nema 3,75 milljónum punda en Pique er talinn vera einn efnilegasti varnarmaður Evrópu. Tækifærin hafa þó verið af skornum skammti hjá United þar sem Nemanja Vidic og Rio Ferdinand hafa átt fast sæti í byrjunarliði United.