Finnur áfram hjá HK

Finnur Ólafsson hefur ákveðið að vera um kyrrt í herbúðum HK þó svo að hann hafi fengið tilboð frá nokkrum úrvalsdeildarliðum.

Þetta staðfestir hann í samtali við Vísi í dag. HK féll úr Landsbankadeildinni í sumar en Finnur var lykilmaður í liði HK og lék alls nítján deildarleiki í sumar.

Hann sagði að þó nokkur lið í úrvalsdeildinni hafi sýnt sér áhuga. „Það var mjög heillandi að spila í efstu deild á næsta ári og það voru nokkur lið sem höfðu samband og gerðu mér tilboð. En ég tók á endanum þá ákvörðun að taka eitt ár í viðbót með HK og reyna að hjálpa til við að koma liðinu aftur upp."

„Ég tel að það sé mjög spennandi áskorun og ég hef mikla trú á Rúnari sem þjálfara. Það voru helstu ástæðurnar fyrir því að ég ákvað að vera áfram."

Hann segir þó að hann sé ekki enn búinn að skrifa undir nýjan samning við HK en á von á því að það muni gerast á næstunni.