Telur kísilverksmiðju ekki valda verulegum neikvæðum umhverfisáhrifum

Skipuagsstofnun telur að losun helstu mengunarefna frá fyrirhugaðri kísilverksmiðju í Helguvík verði fyrir neðan viðmiðunarmörk íslenskra reglugerða og því sé ekki tilefni til að afmarka þynningarsvæði fyrir starfsemina.

Verksmiðjan muni ekki valda verulega neikvæðum og óafturkræfum áhrifum á umhverfið. Þetta kemur fram í álti stofnunarinnar á mati á umhverfisáhrifum verksmiðjunnar.

Það er Icelandic Silicon Corporation sem hyggst reisa verksmiðjuna en það er í eigu Tomahawk Development sem er í eigu íslenskra og danskra aðila. Í fyrsta áfanga er gert ráð fyrir 50 þúsund tonna framleiðslu á kísli en eftir á að úthluta fyrirtækinu losunarheimildir og sömuleiðis að semja um orku.

Gæti þurft að sækja losunarheimildir til útlanda

Skipulagsstofnun segir í áliti sínu að mengun frá verksmiðjunni muni verða í lágmarki en þó muni verða losuð loftmengandi efni sem nemur hundruðum tonna á ári. „Þó svo að styrkur þeirra reiknist ávallt langt neðan viðmiðunarmarka reglugerða, þá telur Skipulagsstofnun áhrif þeirra nokkuð neikvæð," segir í álitinu.

Skipulagsstofnun bendir á að umhverfisráðuneytið eigi eftir að úthluta 1,1 milljónum losunarheimilda sem hægt verði að sækja um á næsta ári. Fái kísilverksmiðjan ekki heimildir þá verði að líkindum að afla losunarheimilda erlendis.

Forsvarsmenn Icelandic Silicon Corporation hyggjast reyna að hagnýta eða farga koldíoxíði en Skipulagsstofnun segir mörgum spurningum ósvarað áður en hægt verði að fullyrða um árangur þess. „Það er því mat Skipulagsstofnunar að kísilverksmiðjan hafi töluverð neikvæð áhrif með losun gróðurhúsalofttegunda. Engu að síður ber að hafa í huga möguleg jákvæð áhrif starfseminnar á losun gróðurhúsalofttegunda, en þau felast í því að fullunnar sólarrafhlöður afla 10-20 sinnum meiri orku en fór til að framleiða þær og því er von til þess að sú orkuöflun komi í stað aðferða sem hafa í för með sér enn meiri losun gróðurhúsalofttegunda," segir Skipulagsstofnun.

Veruleg óvissa um orkuöflun

Þá bendir Skipulagsstofnun á að veruleg óvissa ríki um orkuöflun til kísilverksmiðjunnar. „Skipulagsstofnun telur að vegna óvissu um flutningsleiðir raforku þurfi sveitarfélögin að huga að því hvort bíða eigi með leyfisveitingar fyrir byggingu kísilverksmiðjunnar þar til niðurstaða liggur fyrir um flutning," segir í álitinu.