Kanu mun framlengja við Portsmouth

Framkvæmdarstjóri Portsmouth telur það öruggt að framherjinn Kanu muni semja á nýjan leik við félagið.

Portsmouth bauð Kanu nýjan eins árs samning fyrir tíu dögum síðan en hann á enn eftir að undirrita samninginn.

„Eftir því sem ég best veit eru engin vandkvæði með samninginn og Kanu mun samþykkja hann," sagði Peter Storrie. „Sem stendur er hann staddur með landsliði Nígeríu og ég býst við því að hann muni skrifa undir samninginn þegar undirbúningstímabilið hefst."

Þá er aðstoðarknattspyrnustjóri félagsins, Tony Adams, sannfærður um að Króatanum Niko Kranjcar sé best borgið með því að vera áfram í herbúðum félagsins.

Hann átti góðu gengi að fagna á nýliðnu tímabili og hefur verið orðaður við önnur félög, til að mynda Arsenal.

„Hann hefur verið að standa sig vel bæði með Portsmouth og landsliði Króatíu og er engin ástæða fyrir því að hann ætti að leita annað," sagði Adams.