Kranjcar ánægður hjá Portsmouth

Króatinn Niko Kranjcar segist vera ánægður hjá Portsmouth og sé ekki á leið frá félaginu. Hann hefur verið orðaður við Arsenal að undanförnu.

Arsene Wenger, stjóri Arsenal, hefur verið að leita af manni til að fylla skarð Mathieu Flamini sem fór til AC Milan og ku hann vera hrifinn af Kranjcar.

Hann hefur einnig fylgst grannt með Samir Nasri hjá Marseille en Arsenal er í dag sagt hafa gert tilboð í hann.

„Portsmouth er frábært félag og það er gott að vera hér. Við getum líka leyft okkur að hlakka til UEFA-bikarkeppninnar á næsta ári," sagði Kranjcar en Portsmouth varð um helgina enskur bikarmeistari og vann sér inn þar með þátttökurétt í UEFA-bikarkeppninni.

„Allir knattspyrnumenn dreymir um að spila með bestu félögum heims en eins og er er ég mjög ánægður hjá Portsmouth."