Íslenska landsliðið upp um 21 sæti á lista FIFA

Íslenska karlalandsliðið í knattspyrnu hefur hækkað um 21 sæti á styrkleikalista Alþjóða knattspyrnusambandsins sem birtur var í morgun. Íslenska liðið er nú í 82. sæti listans, en Spánverjar eru í því efsta sem fyrr.

Íslenska liðið er í þriðja sæti yfir hástökkvara listans á topp 100 að þessu sinni. Jamaíka fór upp um 33 sæti í það 83., Kúbumenn upp um 25 sæti og eru í 73. sæti og loks íslenska liðið sem fór upp um 21 sæti í 82. sæti listans.

Spánverjar eru í efsta sæti listans og halda toppsætinu síðan síðast, Þjóðverjar fara úr þriðja sætinu í annað, upp fyrir Ítali. Hollendingar eru í fjórða sætinu og Brasilíumenn í fimmta. Englendingar fóru upp um fjögur sæti og eru komnir í 10. sæti ásamt Portúgölum.