Gunnleifur orðaður við lið á Norðulöndunum

Gunnleifur Gunnleifsson, landsliðsmarkvörður og leikmaður HK, hefur verið orðaður við lið á Norðurlöndunum. Þetta kemur fram í Morgunblaðinu í dag.

Gunnleifur segist hafa heyrt af áhuga bæði Trelleborg frá Svíþjóð og norska liðinu Fredrikstad sem Garðar Jóhannsson leikur með.

„Ég hef heyrt af áhuga þessara liða en veit ekkert meira á þessari stundu. Ég er alveg rólegur yfir þessu en vissulega væri spennandi kostur að reyna sig erlendis," sagði Gunnleifur.

HK féll úr úrvalsdeildinni í haust en Gunnleifur hefur unnið sér sæti í íslenska landsliðinu. Hann á besta möguleika á að halda því sæti með því að leika í íslensku úrvalsdeildinni eða sem atvinnumaður erlendis.