Heiðar kominn til að skora

Heiðar Helguson gerir sér fulla grein fyrir því að hann var fenginn til enska B-deildarliðsins QPR til að skora mörk.

„Auðvitað mun það taka tíma að koma mér almennilega fyrir eins og alltaf hjá nýjum félögum en ég er viss um að ég geti skilað mínu hjá QPR," sagði hann í samtali við heimasíðu félagsins.

„Þegar QPR sýndi mér áhuga hikaði ég ekki við að slá til," sagði hann ennfremur. „Þetta er kjörið tækifæri fyrir mig að fá að spila reglulega. Ég þarf á því að halda."

Það gekk þó ekki áfallalaust fyrir sig að fara til QPR en þangað er hann lánaður frá úrvalsdeildarfélaginu Bolton til áramóta. Ef hann stendur undir væntingum er góður möguleiki á því að hann verði keyptur til félagsins þegar félagaskiptaglugginn opnar í janúar.

Heiðar greindi fyrst frá því í síðustu viku að hann væri að fara til QPR en þá komu upp vandkvæði með samning hans. Þá ætlaði hann að fara til Charlton sem leikur í sömu deild en Bolton hafnaði því. Þegar þangað var komið féllust forráðamenn QPR að breyta samningnum og var þá loksins gengið frá félagaskiptunum.

Heiðar mun leika í treyju númer 27 hjá félaginu.