Áhrifa kaupstefnunnar í Frankfurt gætir langt út fyrir bókmenntirnar

Verði Íslendingar fyrir valinu sem gestaþjóð á bókakaupstefnunni í Frankfurt árið 2011 mun áhrifanna hér á landi gæta langt út fyrir bókmenntirnar, segir framkvæmdastjóri JPV útgáfu. Hann telur Íslendinga eiga góða möguleika á að hreppa hnossið en þeir etja kappi við Finna um sætið.

Egill Örn Jóhannsson, framkvæmdastjóri JPV útgáfu, segir það hafa gríðarlega þýðingu fyrir alla útgáfu á Íslandi ef Íslendingar verði fyrir valinu sem gestaþjóð árið 2011. „Ísland fær gríðarlega athygli í Þýskalandi allt frá því að messunni lýkur árið áður og þar til messunni lýkur 2011. Þetta þýða fleiri klukkustundir af umfjöllun í þýsku sjónvarpi, fjölmargar blaða- og tímaritsgreinar og þá verður áhersla á Ísland í öllum bókabúðum Þýskalands," segir Egill. Hann bendir enn fremur á að um 400 þúsund manns hvaðanæva úr heiminum sæki messuna þannig að kynningin á íslenskum bókmenntum muni ekki einskorðast við Þýskaland.

Hefur án efa áhrif á ferðaþjónustu

Egill segir að gestaþjóðin fái sess á aðaltorgi sýningarsvæðisins og þar sé ekki aðeins kynning á íslenskum bókmenntum heldur Íslandi í heild. „Áhrifanna gætir því langt út fyrir bókmenntirnar og þetta mun án efa hafa áhrif á ferðaþjónustuna hér á landi, segir Egill. Hann segir Þjóðverja hafa gríðarlega reynslu af því að hafa gestaþjóð á kaupstefnunni og forsvarsmenn hennar hafi lagt fram talnagögn sem sýni hvaða áhrif það hafi fyrir þjóðir að vera gestaþjóðir á kaupstefnunni.

Hvað íslenska útgefendur snertir segir Egill að valið muni gera þeim kleift að koma íslenskum höfundum enn betur á framfæri á alþjóðavettvangi og væntanlega verði mikið að gera í sölu útgáfuréttinda hjá íslenskum útgefendum árin fyrir og eftir messuna. Egill hefur sótt messuna og segir að mikil barátta sé um að koma verkum á framfæri. Mikill áhugi hafi þó verið á Íslandi undanfarin ár og íslenskir höfundar hafi átt velgengni að fagna í Evrópu miðað hversu lítil þjóðin er. Það sé grunnur sem hægt sé að byggja á.

Markaðsstjóri messunnar hvatti Íslendinga til að sækja um

Finnar sækja það stíft að verða gestaþjóð bókamessunnar 2011 líkt og Íslendingar og að sögn Egils hafa þeir þegar sent inn umsókn vegna málsins. Íslendingar sendi væntanlega inn umsókn innan fárra daga og í framhaldinu hefjist viðræður við forsvarsmenn kaupstefnunnar. Egill segir að ákveðnar viðræður hafi verið í gangi. Markaðsstjóri messunnar hafi á ferðinni hér á landi nýverið og hvatt Íslendinga til þess að sækja um að vera gestaþjóð. Það hljóti að þýða að Þjóðverjarnir hafi áhuga á að gera Ísland að gestaþjóð messunnar.

Að sögn Steingríms Sigurgeirssonar, aðstoðarmanns menntamálaráðherra, má búast við því að það liggi fyrir eftir einn til tvo mánuði hvort Íslendingar hreppi hnossið.