Deilt um Vieira

Landsliðsþjálfarar og þjálfarar félagsliða eru ekki bestu vinir um þessar mundir enda landsleikjahelgi framundan. Franska knattspyrnusambandið og ítalska liðið Inter deila nú um hvort Patrick Vieira sé leikfær um helgina.

Þessi snjalli miðjumaður hefur ekki getað verið með Inter nú í byrjun tímabils á Ítalíu vegna meiðsla. Hann er þó ákveðinn í að spila með franska landsliðinu gegn Ítalíu en þetta eru sömu lið og mættust í úrslitaleik heimsmeistaramótsins.

„Patrick hefur síðustu viku ekki snert bolta á æfingum. Það væru mistök að láta hann spila á föstudaginn. Ég treysti á að franska knattspyrnusambandið muni taka faglega ákvörðun í þessu máli," sagði Ivan Carminati í viðtali en hann er í þjálfarateymi Inter.

Raymond Domenech, þjálfari Frakklands, segir að það verði leikmaðurinn sjálfur sem muni taka ákvörðun um það hvort hann spili. „Ég hef aldrei tekið neina áhættu með leikmenn og mun aldrei gera það," sagði Domenech.